Baráttukonan og ritstýran Margrét Friðriksdóttir er sannfærð um að notkun handspritts sé okkur hættuleg þar sem sprittið innihaldi krabbameinsvaldandi efni. Sjálf segist hún guðs lifandi fegin að hafa ekkert notast við handspritt í kórónuveirufaraldinum.
Margrét náði loksins að smita sjálfa sig af Covid-19 en hún reyndi lengi að smitast, meðal annars með því að láta smitaðar dætur sínar anda framan í sig og sleikja glös sem þær höfðu drukkið úr. Í faraldrinum notaði hún aldrei spritt að eigin sögn.
„Innsæið sagði mér ekki að nota þetta rusl, var duglegri við handþvottinn með handsapu, nú er komið í ljós að 44 tegundir af handspritti innihalda krabbameinsvaldandi efni, segir Margrét ákveðin og vísar til erlendra frétta þess efnis.
Margrét er skráð í alþjóðlega samanburðarrannsókn þar sem reynt verður að finna út hvor hópurinn er betur varður gegn kórónuveirunni, bólusettir eða óbólusettir. Varla þarf að taka það fram að Margrét tilheyrir síðari samanburðarhópnum enda hefur hún lengi talað gegn bólusetningum hér á landi gegn veirunni skæðu. Samkvæmt rannsókninni segist Margét alls ekki mega láta bólusetja sig gegn Covid-19.
