Leikkonan Goldie Hawn hefur nú yfirgefið leikarann Kurt Russell eftir heiftarlegt rifrildi. Óttast vinir þeirra að það sé til marks um að þau séu endanlega skilin.
Atvikið sem um ræðir var víst afar heiftarlegt en hin 71 árs leikkona stormaði út úr strandarhúsi þeirra í Malibu, Kaliforníu. Gerðist þetta einum degi eftir að Goldie sást snæða hádegisverð með ungum manni á veitingastaðnum fræga, The Ivy í Beverly Hills.
Goldie var víst svo reið að hún gleymdi að skella afturhurðinni á bílnum. Kurt hljóp út úr húsinu og uppí jeppann sinn, væntanlega til að elta hana. Ekki vildi betur til en hann keyrði yfir umferðarkeilu sem festist undir bílnum og hann þurfti að stöðva bílinn til að ná henni undan. Þá var Goldie komin úr augsýn. Sjónarvottar segja hann hafa verið „alveg brjálaðan.“
Parið hefur verið saman síðan 1983 en aldrei gift sig. Þau eru nú að ganga í gegnum erfiðleika því þau hafa ekki sömu sýn á efri árin, hvernig þau vilja eyða þeim og hvað þau vilja setja í forgang.
