Par sem hittist á vefsíðu sem sérhæfir sig í ævintýrum fyrir gifta ætla að gifta sig á næsta ári en þau segjast ætla að vera hvort öðru trú í þetta skiptið.
Frumkvöðullinn Thea Thorpe, 30, mun ganga að eiga framkvæmdastjórann Jack Logan-Beddings, 36, sumarið 2020 eftir að hafa kynnst á vefsíðunni og héldu þau bæði framhjá fyrrverandi mökum.
Segjast þau hafa „lært af fyrri mistökum” og treysta hvort öðru til að gera slíkt ekki aftur. Thea segir: „Já, við höfum bæði haldið framhjá í fortíðinni en þetta er nýtt upphaf hjá okkur báðum. Við höfum bæði haft frjálslegt viðhorf gagnvart einkvæni en það er breytt í dag.”
Thea var í langtímasambandi með kærastanum sínum en Jack var giftur þegar þau hittust.
„Við héldum að vera í opnu sambandi væri leiðin að hamingjunni því lífið væri of stutt til að eyða því með einum maka. Það breyttist allt þegar ég hitti Jack. Ég vildi eyða lífinu með honum og það þýddi að hætta þessu framhjáhaldi. Ég veit þetta er ekki hefðbundin ástarsaga en það er sagt að ástin finni sér leið – og það var svo sannarlega þannig hjá mér og Jack.”
Jack segir: „Ef þú hefðir sagt mér að ég myndi hitta draumakonuna á framhjáhaldssíðu myndi ég ekki hafa trúað þér, en eftir fyrsta stefnumótið með Theu vissi ég að ég vildi ekki deila henni með neinum öðrum. Ég vil búa til framtíð með henni sem eðlilegur maður í eðlilegu sambandi.”
Thea og Jack fóru að hittast fyrir um ári síðan en þau búa bæði í Nottingham, Bretlandi. Thea þjálfar dansara og Jack ræður menn í byggingarvinnu.
Thea segir: „Við vorum bæði í samböndum þar sem við höfðum leyfi til að halda framhjá. Ég hitti marga menn reglulega og notaði stefnumótasíður. Það hentaði mér að leita að manni á þessari framhjáhaldssíðu því þar væri fólk í opnum samböndum líka.”
„Ég var í mörgum svona samböndum og hélt ég væri að lifa hinu fullkomna lífi – með miklu kynlífi en eiga alltaf einn reglulegan félaga heima. Í langan tíma sannfærði ég mig sjálfan um að þetta væri það sem ég vildi og ég væri að njóta þess besta úr báðum heimum. Ég fékk fiðring þegar ég hitti nýjan félaga og svo varð það leiðinlegt eftir nokkur skipti. Ég gat samt bara haldið áfram án vandkvæða. Þegar ég hitti Jack breyttist allt,” segir Thea.
Jack og Thea er fyrsta parið sem kynntist á síðunni llicitEncounters sem opinberar brúðkaup í framhaldi af kynnum þar.
„Ég áttaði mig á að langtímasambandið mitt var bara bull og kynlífið sem ég átti utan þess var bara tilgangslaust. Með Jack vissi ég að ég ætti eitthvað mun merkilegra og ég gæti ekki afborið að vita af honum með annarri konu. Eftir nokkur skipti hættum við bæði með mökum okkar og hættum á þessari síðu. Við erum trú hvort öðru og getum ekki beðið eftir að gifta okkur á næsta ári.”
Jack hafði verið konu sinni ótrúr oft og mörgum sinnum. Hann er enn giftur fyrri konu sinni og það er ekki fyrr en skilnaðurinn gengur í gegn að þau geta gengið í hnappelduna. „Ég hafði hitt konur á síðum áður en ég hitti Theu. Þetta var gaman fyrst en svo verður það bara þreytandi – að fara úr einu sambandi í annað á meðan þú ert giftur. Ég tengdist engri í rauninni þar til ég hitti Theu og þá kom ástin eins og elding í hausinn.”
Jack segist treysta Theu algerlega og segist hafa verið trúr síðan hann varð ástfanginn: „Við getum ekki verið í sundur og ég veit hvar hún er 24/7 – við treystum hvort öðru fullkomlega og getum ekki beðið eftir að byggja upp framtíðina saman.”
Thea segir: „Þótt við höfum haldið framhjá áður þýðir það ekki að það muni gerast aftur. Þetta er öðruvísi með Jack.”
Til að koma í veg fyrir framhjáhald í framtíðinni vinna þau með sambandsráðgjafa sem kennir fólki að eiga í heilbrigðum samböndum.
Jessica Leoni, talskona vefsíðunnar IllicitEncounters, þar sem parið kynntist segir: „Við erum mjög ánægð að vita að Jack og Thea eru að ganga í það heilaga eftir að hafa hist á síðunni. 10% fólks sem notar síðuna finnur ástina á meðan meirihlutinn gleðst að halda framhjá með fólki sem hugsar eins.”
Jack og Thea eru fyrsta parið sem gengur í það heilaga eftir að hafa kynnst á síðunni, svo vitað sé.
