Guðmundu Áróru Pálsdóttur brá heldur betur í brún þegar henni var bent á að stofnuð hefði verið síða á samskiptaforritinu TikTok um dóttur hennar sem ber heitið „Hötum Rúnu: Allir að blocka Rúnu hun er algert ógeð.“ Guðmunda vill fá að vita hver stofnaði síðuna og vil að foreldrar fylgist með. Hún segir: „Það er ágætt að þessi umræða komi upp og því miður er hún bara ein af mörgum tilfellum svo vonandi vekur þetta foreldra að fylgjast með hvað er í gangi í símunum hjá börnunum sínum. Ef þið skoðið þetta forrit þá er alltof mikið til af hötum þennan og hinn sem á alls ekkert að líðast.“
Guðmunda birtir myndir og texta af síðunni á Facebooksíðu sinni sem hún gaf góðfúslegt leyfi til að birta:
Aldrei hélt ég að þetta myndi gerast en í kvöld komst ég að því að einhverjir óprúttnir aðilar eru bunir að búa til síðu á forritinu Tiktok undir nafninu Hötum Rúnu! Hjartað mitt er gjörsamlega í molum 💔Ég hef alltaf brýnt fyrir mínum stúlkum að einelti líðum við ekki á þessu heimili og aldrei skuli taka þátt í því og segja frá ef einhver sé að leggja einhvern annan í einelti en núna er verið að leggja mitt barn í neteinelti sem er hrikalegt þar sem ekki er hægt að rekja slóðina nema með hjálp annara foreldra, því bið ég um alla foreldra barna með þetta forrit að fara vel yfir símana þeirra og passa uppa að þau séu ekki að taka þátt í svona löguðu og brýna fyrir þeim hversu alvarlegt svona er sama hvort það sé á netinu eða ekki. Við vitum aldrei hvað svona ungir krakkar gætu gert þegar þau fá svona ljót skilaboð 😢
Ef eitthvert foreldri sem ég þekki hér inna Fésinu sér þessa síðu inni hjá barninu sínu þá má endilega reyna að komast að því hver bjó þetta til þar sem ég myndi vilja fá að komast að því til að ræða saman við foreldra þeirra barna sem að taka þátt í svona löguðu. Við Bjarki erum niðurbrotin hér heima núna og erum algjörlega ráðalaus hvað við getum gert. Set hér með myndir sem að voru settar inná þessa síðu sem eru mjög svo ljótar 😔 þetta vandamál hefur staðið lengi eða frá 2. bekk með hléum en núna er þetta orðið rosalega ljótt og alvarlegt og hún segir okkur ekki frá þessu heldur erum við að heyra þetta frá öðru foreldri sem blöskraði þessi skilaboð til hennar inná þessu forriti!
