Er stjörnuparið George og Amal Clooney að skilja? Slúðurmiðlar vestanhafs keppast við að segja frá því að brestur sé kominn í hjónabandið og Amal hafi flúið heimili þeirra í Bretlandi og komið sér fyrir á eyjunni Sardiníu, Ítalíu með tvíburana Alexander og Ellu.
Sagt er að George hafi grátbeðið hana um að koma aftur og þrái að sjá tvíburana og hana, því hann elskar þau öll: „George er ekki með sjálfum sér. Vinir hans segja að hann geti ekki á heilum sér tekið því hann sakni þeirra svo. Amal fékk nóg eftir heiftarlegt rifrildi og tók börnin með sér. Hún hefur víst tilkynnt honum að ef hann ætli að koma þurfi hann að dveljast í gestahúsinu,“ segir ónefndur heimildarmaður í viðtali við Hollywood Gossip.
Sagt er að þeir sem þekkji hjónin hvað best eru ekki hissa á að Amal sé búin að fá nóg, enda hefur George alltaf verið laus og liðugur og þekktur sem eftirsóttur piparsveinn áður en þau giftu sig: „Fólki fannst skrýtið að þau eyddu ekki brúðkaupsafmælinu sínu saman og það var staðfest þegar Amal kom ekki í veislu sem haldin var á vegum tekílafyrirtækis George, Casamigos, en viðskiptafélagi hans, Randy Gerber var þar [eiginmaður Cindy Crawford].“
