Fyrrum Friends-stjarnan Jennifer Aniston er sögð hafa augastað á Star Wars leikaranum Oscar Isaac. Það er þó eitt ljón í veginum: Hann er nefnilega giftur.
„Jen er ofsalega skotin í Oscari, mjög,“ sagði vinur stjörnunnar í viðtali við Radar. „Þau hafa oft hist í ýmsum viðburðum í Hollywood og hún myndi svo sannarlega vilja kynnast honum betur. Samt sem áður getur þetta ekki orðið neitt meira en saklaust daður.“
Isaac, 39, leikur flugmanninn myndarlega, Poe Dameron í köflum VII, VIII og IX í geim-sápuóperunni. Hann hefur nú þegar fundið sína prinsessu, sem er danska leikstýran Elvira Lind. Þau gengu í hjónaband í febrúar 2017 og sonur þeirra Eugene fæddist í apríl 2017.
„Oscar elskar konu sína og barn, en er svo dulur og talar sjaldan um þau. Þessvegna er auðvelt fyrir fólk að gleyma að hann er ekki einhleypur,“ segir vinurinn.
Oscar og Jen eiga það sameiginlegt að tengjast Star Wars, en fyrrverandi eiginmaður hennar Justin Theroux lék Master Codebreaker í The Last Jedi. Það er þó ekki um að ræða vináttu milli þeirra tveggja: „Nei, Jen getur huggað sig við það að Oscar og Justin eru meiri keppinautar en vinir.“
Þrátt fyrir að Oscar sé frátekinn og hamingjusamlega giftur kemur það ekki í veg fyrir að Jennifer vilji hitta hann og hugsanlega vinna með honum í framtíðinni: „Henni þykir hann ótrúlega hæfileikaríkur og myndarlegur. Ef hún getur ekki verið með honum myndi hún kjósa mann eins og hann!“
