Söngkonan Barbra Streisand er nú orðin 75 ára gömul og hafa aðdáendur og vinir hennar áhyggjur af heilsu hennar. Er talið að söngkonan þjáist af heilabilun. Globe segir að Barbra sé orðin svo áttavillt að hún eigi til að týnast eða ráfa í burtu ef hún er annarsstaðar en heima hjá sér.
Í raun er ástandið orðið það slæmt að Barbra kýs að yfirgefa ekki heimili sitt í Malibu sem hún deilir með eiginmanninum James Brolin. Hún heldur sig heima við til að týnast ekki úti: „Hún týnist í verslunum og verður ringluð á uppáhalds veitingastaðnum sínum, sem er ástæðan fyrir að hún er mest heima við,“ segir nafnlaus heimildarmaður.
Þrátt fyrir að söngkonan hafi komið fram á Golden Globes á dögunum þar sem ekkert benti til vandræða, er hún mjög einangruð: „Hún vill ekki fara í tónleikaferðalög. Það er of mikið vesen að fara að heiman. Heimilið er öryggi hennar. Henni er boðið ýmislegt, að sjálfsögðu, en hún neitar oftast, þrátt fyrir að um sé að ræða litla hittinga með vinum eða nágrönnum. Hún vill vera ein og margir vinir hennar hafa áhyggjur af því að hún sé á fyrstu stigum heilabilunar.
Barbra sagði frá minnisglöpum sínum í Netflixþættinum Barbra: the music…the Mem’ries…the Magic! og sagði þau vera ítrekuð: „Hún labbaði um sviðið og gleymdi hvar myndavélarnar voru. Hún grínaðist með að setja gular línur á gólfið svo hún gæti fundið búningsherbergið, en í raun er það ekkert fyndið,“ segir vinurinn.
