Þörf ábending móður nokkurrar sem lenti í slæmu atviki með son sinn hefur verið deilt ótal sinnum á Facebook því það gæti gerst fyrir alla sem umgangast lítil börn sem enn nota bleyju.

Hayley Turner, bresk móðir, var úti með son sinn og þurfti hann á nýrri bleyju að halda. Fór hún á almenningssalerni þar sem komið hafði verið fyrir skiptiaðstöðu fyrir foreldra. Hayley hafði oft notað sama salerni í þessum tilgangi en um leið og hún lagði drenginn á mottuna á skiptiborðinu öskraði hann upp yfir sig. Fyrst hélt hún að Samuel litli væri bara þreyttur og hugsaði ekki meira um það, en þegar hún lyfti honum upp eftir að hafa skipt á honum sá hún að bak hans var eldrautt.

Hún leit strax á mottuna og fékk hálfgert áfall, því einhver hafði stungið teiknibólum í mottuna. Skrifaði hún á Facebook: „Einhverjum aumingja datt í hug að það væri „gaman“ að setja teiknibólur í mottuna á skiptiaðstöðunni. Ég trúi þessu varla – hverjum finnst þetta fyndið að gera litlum börnum slíkan grikk? Elsku Samuel, hann er ekki nógu gamall til að segja hvað væri að, nú lítur bakið á honum út eins og nálapúði!“

Vildi hún með skilaboðunum vara aðra foreldra við slíkum opinberum aðstöðum fyrir börnin því hún telur að hafi þetta komið fyrir hana gæti það komið fyrir hvern sem er.