Tilkynning um skilnað leikaraparsins Ben Stiller og Christine Taylor kom mörgum í opna skjöldu, enda voru þau gift í 17 ár. Nú hefur ýmislegt komið upp á yfirborðið varðandi skilnaðinn, m.a. ranghugmyndir sem Ben er haldinn, kynlífslaust hjónaband sem og hrifning hans á annari konu: „Það var Ben að kenna að þau skildu,“ segir nafnlaus vinur hjónanna í viðtali við Radar.

Hjónin höfðu mikið rifist um samband Bens og vinkonu hans sem hann hitti við tökur á mynd: „Ben var alltaf að tala um hana og var greinilega heillaður af henni. Hann var alltaf að tala um hversu hæfileikarík hún væri og hún ætti „eftir að komast langt.““

Christine var ekki skemmt vegna gráa fiðringsins sem gerði vart við sig hjá eiginmanninum og þau rifust stöðugt síðustu mánuði því Ben var alltaf í sambandi við konuna og sagðist bara vera „að leiðbeina henni.“ Christine trúði ekki orði og gaf honum úrslitakosti: Að hann hætti algerlega samskiptum við hana. Í fyrstu samþykkti hann það, en svo komst Christine að því að hann var enn að tala við hana, dag og nótt úr farsímanum sínum. Þegar hún vildi fá svör reiddist Ben og sagði: „Þú segir mér ekki við hverja ég er í samskiptum. Hættu þessu og gefðu mér frið!“

Christine á víst að hafa reiðst mjög og fundist sem um algeran trúnaðarbrest væri að ræða.

Ben Stiller fékk krabbamein í blöðruhálskirtil árið 2014. Meinið var fjarlægt og segir Ben að það hafi ekki tekið sig upp að nýju. Það hafði þó sínar afleiðingar: „Eftir þetta deildu hjónin varla rúmi. Eftir þetta fór Ben að vorkenna sjálfum sér mjög. Hann fór að verða ímyndunarveikur og með ranghugmyndir. Á nokkurra mánaða fresti var hann sannfærður um að krabbinn hefði snúið aftur. Christine var að verða brjáluð því hann kvartaði svo mikið og hegðunin var ofboðslega óstöðug. Hún átti engra annarra kosta völ en að skilja við hann. Alltaf þegar hún reyndi að hjálpa varð hann kvíðnari, fór að skella hurðum, brjóta hluti og tryllast fyrir framan börnin þeirra tvö og vini.“

Börn parsins eru 12 og 15 ára.