Knattspyrnudeild Tindastóls hefur nú sent frá sér stuðningsyfirlýsingu  til handa sóknarmannsins Ragnars Þórs Gunnarssonar sem var dæmdur fyrir kynferðisbrot gegn stúlku undir lögaldri. Ragnar var 20 ára þegar brotin áttu sér stað en stúlkan aðeins 15 ára. Á domstolar.is má lesa um dóminn en þar segir m.a.:

Fyrir kynferðisbrot og brot gegn barnaverndarlögum, með því að hafa á tímabilinu […] 2015, ítrekað áreitt A kynferðislega, með því að hafa […] 2015, í […], Reykjavík, snert rass hennar utan klæða og í framhaldi, í gegnum samskiptaforritið Snapchat, ítrekað sent henni gróf kynferðisleg skilaboð þar sem ákærði bað hana um að stunda kynlíf með sér, óskaði eftir að hún sendi honum myndir af sér léttklæddri, spurði hana út í reynslu hennar af kynlífi og ræddi eigið kynlíf, viðhafði kynferðisleg ummæli um líkama hennar og sendi henni í að minnsta kosti eitt skipti mynd af eigin kynfærum.

Telst þetta varða við 199. gr. almennra hegningarlaga nr. 19/1940 en til vara við 209. gr. sömu laga. Háttsemin telst jafnframt varða við 3. mgr. 99. gr. barnaverndarlaga nr. 80/2002.

Auglýsing

Í yfirlýsingu Tindastóls segir m.a.:

„Ragnar Þór nýtur stuðnings og trausts knattspyrnudeildar Tindastóls og munum við gera það sem við getum til að aðstoða hann í framhaldinu. Nú er það undir honum komið að halda áfram með líf sitt og læra af þeim mistökum sem gerð voru.

Ragnar Þór er ungur maður sem er að stíga sín fyrstu spor sem fullorðinn einstaklingur í samfélaginu og gerðist sekur um dómgreindarbrest og hefur nú fengið sinn dóm fyrir það.“