Kylie Jenner er samkvæmt gulu pressunni þreytt á að dæla peningum í kærastann Tyga. Rapparinn sem er metinn á 2 milljón dollara hefur verið verulega óvarkár í peningamálum og „Kylie er búin að fá alveg nóg,“ segir nafnlaus heimildarmaður í viðtali við Hollywood Life: „Að minnsta kosti í bili. Hún reyndar skiptir um skoðun eins og nærbuxur og Tyga hefur alltaf einhverjar leiðir til að lauma sér aftur upp í rúm til hennar.“

Kylie sem er 19 ára gömul segir að henni líði eins og þau hafi komist á endastöð sem par: „Í rauninni leiddist henni í sambandinu og henni fannst eins og ekkert væri að þokast í rétta átt. Þau hafa verið saman í 18 mánuði og enginn hringur kominn enn… Kylie er ekki að hitta neinn annan og hún telur hann ekki hafa haldið framhjá sér en hún er mjög sannfærð um að hún geti landað heitari og ríkari kærasta.“

Annar nafnlaus heimildarmaður segir: „Kylie vill endilega giftast Tyga…þau hafa verið saman svo lengi þannig hún vill að hann biðji hennar. Hún er með brúðkaup á heilanum og allt sem hún hugsar um eru hringar, brúðarkjólar og brúðkaupsferðir. Hún hefur skipulagt allt í hausnum á sér, það eina sem vantar er bónorð.

Tyga veit þetta en spilar ekki þennan leik við hana: „Honum finnst þau bæði of ung og hann er ekkert að flýta sér. Hún er þó með börn og brúðkaup á heilanum!“

Aðeins er mánuður síðan raunveruleikastjörnurnar fögnuðu Valentínusardegi frá toppi Empire State byggingarinnar þar sem þau voru á tískuvikunni í New York.