Þeir ríkustu lifa af? Kenning Darwins um að hinir hæfustu lifi af má ef til vill heimfæra á þá ríku nú til dags. Nú hefur myndband verið gert opinbert af lúxus-neðanjarðarbyrgi sem aðeins hinir ríkustu geta keypt sér aðgang að muni stríð bresta á eða kjarnorkustyrjöld. Nú þegar Donald Trump er tekinn við sem valdamesti maður í heimi er það því miður ekki fjarlæg martröð. Byrgið sem kallast Survival Condo er svo sannarlega ekkert slor, gert er ráð fyrir að auðkýfingar geti sinnt öllum sínum daglegu „þörfum“ og er þar um að litast eins og í einhverri framtíðarmynd. Er byrgið staðsett í Kansasríki í Bandaríkjunum en nánari staðsetning er ekki gefin upp. Eigendur íbúðanna eru flestir frá öðrum ríkjum Bandaríkjanna.

Nokkrar íbúðir eru staðsettar í byrginu og er hægt að kaupa sér hæð eða hálfa hæð á 1,5M dala eða 3M dala. Þar er að finna skólastofu, hundagerði, klifurvegg, keiluhöll, bíóhús, heilsulind og hvaðeina sem hugurinn girnist. Mikil öryggisgæsla er þar til að tryggja íbúum frið og ró – hvað sem gengur á og eru varðmenn þar með vopn ef til þarf. Veggir byrgisins eru 10 fet að þykkt og eiga að þola kjarnorkusprengju. Íbúðirnar eru nú uppseldar en í bígerð er að gera annað byrgi svo aðeins þeir sem ríkastir eru geti lifað af hörmungar.