Aðstandendur Birnu Brjánsdóttur sem standa að Facebooksíðunni Leit að Birnu Brjánsdóttur hafa sent frá sér eftirfarandi yfirlýsingu sem varðar leitina sem fram mun fara um helgina og verður ein sú umfangsmesta sem um getur. Áætlað er að mörg hundruð björgunarsveitarmenn taki þátt í leitinni, skv. frétt frá RÚV. Biðla þau til almennings að fara ekki að leita nema um slíkt sé beðið og þakka þau jafnframt allan stuðning sem þau hafa fengið frá samfélaginu. Einnig koma þau skilaboðum til almennings hvað fjársöfnun varðar.

Tilkynningin er hér í heild sinni:

Kæru hjálpfúsu borgarar.

Um leið og við þökkum ykkur frá dýpstu hjartarótum fyrir alla þá óeigingjörnu vinnu sem þið hafið lagt af mörkum við leitina að Birnu þá höfum við fengið nokkrar fyrirspurnir varðandi að safna fé fyrir aðstandendur, lögreglu og/eða björgunarsveitir. Okkar langar því að koma eftirfarandi á framfæri:

Allar okkar hugsanir snúast fyrst og fremst um að finna Birnu.

Björgunarsveitir og lögregla verða með víðtæka leit á suðvesturhorninu á morgun og við viljum að sjálfsögðu ekki gera neitt sem getur haft áhrif á þeirra aðgerðir. Að ósk lögreglu höfum við því ákveðið að halda að okkur höndum hvað varðar frekari leit sjálfboðaliða. Ef á einhverjum tímapunkti lögreglan óskar eftir því við okkur að við setjum leitina af stað aftur þá munum við koma með tilkynningu hér á síðunni.