Hrottafengnar súkkulaðiköngulær, blæðandi jarðarber með stífþeyttum rjóma og hnarreistir smákökusporðdrekar. Allt þetta og meira til töfrar hin bandaríska Christine McConnell fram, en hún er búsett í Los Angeles og starfar sem ljósmyndari.

Á góðum degi getur hún töfrað fram ógeðfellt og ljúffengt hryllingskökusafn og ber fram á rósóttum kökudiskum; með köflótta svuntu að vopni, undarlega brosmild og eins og klippt út úr tískuriti frá fimmta áratugnum.

Hver man ekki eftir skrímslinu úr Alien seríunni ….

Hryllingsbakstur Christine er síður en svo gerður í gróðraskyni, en í nýlegu viðtali við Buzzfeed segist stúlkan af fátæku fólki komin og að langan tíma hafi tekið hana að safna fyrir fyrstu myndavélinni sem hún nýtir meðal annars til að mynda eigin listaverk sem flest birtast á Instagram. Kökurnar selur hún ekki, heldur bakar fyrir vini og fjölskyldu – tekur upp hrærivélina um helgar og myndar eigin sköpunarverk í bak og fyrir.

Þessi hnallþóra myndi sóma sér vel á kaffiborði Adams fjölskyldunnar:

Hér má t.a.m. sjá viðbjóðslegar vöfflur Christine, en hún starfar sem stílisti, fyrirsæta, ljósmyndari og leggur stund á förðunarnám.

Mannýg jarðarber með rjóma … hver vill ekki smakka slíkt?

Þá er ekki að furða að Instagram reikningur ríflega þrítugrar húsmóðurinnar skuli njóta slíkra vinsælda sem raun ber vitni, en yfir 135.000 manns fylgja henni á samskiptamiðlinum og fer aðdáendahópurinn ört stækkandi.

Hér má sjá Valentínusarskreytingar að hætti Christine:

Reyndar minna stílíseringar Christine um margt á stúlkurnar í Stepford Wives, þar sem hún svipbrigðalaus situr fyrir á eigin myndum og skreytir meðal annars draugahús, geimskrímsli og aðra viðurstyggilega vætti – sem allir eiga það sameiginlegt að bragðast einkar vel.

Hrífandi Hrekkjavökuþema þar sem húsfrúin trónir í forgrunni:

Sjálf segist Christine hafa lært að baka af áhorfi YouTube myndbanda og bera sköpunarverk hennar vitni aðdáunar hennar sjálfrar á eitthvað sem lendir mitt á milli Tim Burton, The Addams Family og Desperate Housewives, með slettu af Hitchcock einhvers staðar inn á milli. Sjálf segist hún einmitt mikill aðdáandi fyrrgreindra en hún heldur einnig mikið upp á Vincent Price og Paulu Deen.

Undursamleg brúðkaupsterta; höggormurinn í aldigarði Eden:

Christine sagði blaðamanni Buzzfeed að hún væri algerlega hugfangin af fyrri hluta síðustu aldar:

Ég er alveg heltekin af fegurðinni sem einkenndi fjórða, fimmta og sjötta áratuginn. En svo er ég líka hrifin af fáránleikanum sem litaði áttunda áratuginn. Þess vegna bera kökurnar mínar svona hallærislega hrottafenginn blæ, því þær endurspegla allt þetta.

Kökuhlaðborð sem er eins og klippt úr Stepford Wives:

Aðspurð segist Christine ekki hafa hugmynd um hvernig hún ætti einu sinni að verðleggja eigin verk:

Nei, ég baka bara fyrir fjölskyldu og vini að gamni mínu. Vinnan að baki hverri köku er svo flókin að ég myndi ekki einu sinni vita hvernig ég ætti að verðleggja þær. Svo fæ ég stöðugt nýjar hugmyndir og ég vona að mér þverri aldrei þróttur til að læra og útfæra nýjar og öðruvísi hugmyndir.

Allur réttur áskilinn:

christinehmcconnell@instagram