Hún heitir Kristina Kuzmic og gefur út sprenghlægileg myndbönd sem mörg hver snúast um móðurhlutverkið. Einhver vekja athygli og önnur þeirra falla í gleymskunnar dá, en paródían hér að neðan hefur bókstaflega gert allt vitlaust á netinu.
Kristina, sem heldur úti Facebook síðu og eigin vefsíðu, segir meðal annars á Facebook síðu sinni að athugasemdirnar, hatursbréfin og dónaskilaboðin sem yfir hana flæddu eftir útgáfu brjóstaparódíunnar hafi orðið svo yfirgengileg að hún hafi vart vitað hvort hún ætti að gráta eða hlæja.
Meðal þeirra sem sent hafa konunni að baki þessu fáránlega fyndna ádeilumyndbandi, ofsafengin skilaboð, eru brjálaðar mæður sem hafa lýst því fjálglega yfir að þær brjóstfæði börn sín þar sem þeim dettur helst í hug og láti enga Kristinu leggja sér lífsreglurnar.
Þú ert bara fáviti því þú styður ekki brjóstfæðandi mæður! Ég gef bara barninu mínu brjóst hvar sem ég vil og þú getur bara hoppað upp í afturendann á þér!
Klámfengnari skilaboð hefur Kristina þó líka fengið og snúast þau flest um að fyrst brjóstagjöf sé viðurkennd á almannafæri, geti ekki verið neitt að því að ástunda sjálfsfróun fyrir allra augum líka.
Sjálf segist Kristina undrandi á viðbrögðunum, þakklát fyrir athyglina sem ádeilumyndbandið hefur vakið og að fylgjendur hennar megi eiga von á öðru keimlíku myndbandi innan tíðar, þar sem hún hyggst taka á fjórum helstu ástæðum þess að feður eru með öllu óþarfir, en rétt er að geta þess að um hárfína ádeilu er að ræða.
