Samsæriskenningar fengu byr undir báða vængi eftir útgáfu myndbands við sjóðheitan dúett þeirra Beyoncé og Nicki Minaj fyrr í þessari viku, en lagið Feelin’ Myself hefur fengið gífurlega umföllun í heimsmiðlum undanfarna sólarhringa.
Eins og áður spegúlerar nú bandaríska slúðurpressan í mögulegum átökum innan poppheimsins og einnig hvort verið geti að Nicki sé að gera lítið úr rapparanum Tiga, sem er 25 ára gamall og er barnsfaðir fyrirsætunnar og samskiptamiðlamógúlsins Blac Chyna.
Eins og kunnugt er, tók Tiga upp náinn vinskap við hina 17 ára gömlu Kylie Jenner fyrir skömmu og risu hár á hnakka sérfræðinga vestanhafs, þar sem stúlkan er undir lögaldri. Í myndbandinu birtist Nicki meðal annars í kolsvörtum GIVENCHY stuttermabol sem ber yfirskriftina PERVERT 17 og var það nóg til að setja netið á annan endann.
Sjálf birti Beyoncé stiklu úr myndbandinu á Facebook, þar sem valin atriði voru sýnd en myndbandið er einungis fáanlegt í fullri lengd gegnum tónlistarsíðuna TIDAL, sem er m.a. í eigu Carter hjónanna, öðru nafni Beyoncé og Jay Z.
Reyndar er ekki úr vegi að ætla að þarna hafi fröken Minaj einmitt nýtt tækifærið, rétt eins og Drake, sem slaufaði Tiga á mixteipinu If You Are Reading This Now It’s Too Late með orðunum:
It’s so childish callin’ my name
on the world stage,
You need to act your age,
and not your girl’s age
Enginn vafi leikur á því að þarna var Drake að leggja spilin á borðið og að stúlkan sem hér var átt við er Kylie, sem er enn á unglingsaldri. Þá mun Nicki ekki einungis vera náinn samstarfsfélagi Drake, heldur lenti hún einnig í opinberum útistöðum við Tiga í mars sl. vegna netleka á laginu Truffle Butter. Drengurinn mun þess utan hafa spilað út stórleik í klögum á Twitter, sem Nicki svaraði síðar gegnum viðtal á BBC Radio. Hún svaraði um hæl og sagði m.a.:
I thought that was a little bit disrespectful because I had always shown him love
Hverju sem kenningum líður, fór einnig sá orðrómur af stað að dívurnar tvær, sem sóttu Coachella tónlistarhátíðina í ár, væru ósáttar og þyldu í raun ekki að vera í sama herbergi. Ástæðan var ljósmynd sem birtist af þeim hlýða saman á tónleika Drake þar sem hvorugri stökk bros á vör.
Ekkert reyndist hæft í þeim orðrómi þar sem tvíeykið var nýkomið úr tökum á Feelin’ Myself en hér er stiklan sem Beyoncé birti á Facebook í þessari viku. Fleiri svipmyndir má skoða á vefsíðu Beyoncé en á TIDAL má sjá sjóðheita útgáfuna í fullri lengd:
