Þegar Miley Cyrus er ekki að troða upp á sviði með gervitittling um mjaðmirnar eða kýta við Nicki Minaj frammi fyrir milljónum manns í beinni útsendingu, þenur hún raddböndin og heillar þá sem á vegi hennar verða með gífurlega þróttmikilli söngröddu sem er nær ójarðnesk að gæðum.

Þannig flytur stúlkan jólaballöðuna Silent Night, eða Heims um ból í íslenskri þýðingu, á nýútkominni jólaútgáfu sjálfs Bill Murray sem ber heitið A Very Murray Christmas. Þáttinn má nálgast á Netflix og halda gagnrýnendur vart vatni yfir frammistöðu Miley, sem, íklædd látlausum hátíðarkjól, virðist óravegu frá þeirri dónastúlku sem hún gefur sig iðulega út fyrir að vera.

Miley stígur hér fram sem lítt þekkjanleg í hlutverki söngdívu sem býr yfir þroska, ómældum þokka og fáséðri yfirvegun með hljóðnemann í hönd. Miley er komin í jólagírinn og verður það ekki af henni tekið að stúlkan býr yfir hæfileikum á sviði sönglistar og raddsviði sem er á heimsmælikvarða í einu orði sagt, slík er yfirvegun hennar með hljóðnemann þar sem hún trónir fáklædd ofan á flygli píanóleikarans.

Samskiptamiðlar hafa bókstaflega logað síðan flutningur Miley á þessari fögru jólaballöðu leit dagsins ljós nú á föstudag, en hér má hlýða á og sjá stórsöngkonuna slá vopnin úr höndum heimsbyggðarinnar: