Sjóðheit spá Váhildar sem ber að taka alvarlega! Váhildur mun nú spá fyrir Íslendingum á næstu vikum og mánuðum. Hún segir hlutina umbúðalaust…ekki láta þér bregða…
Steingeitin 22. des – 21. jan
Frami og velsæld
Nú skaltu fara varlega í jólainnkaupunum og óþarfa eyðslu. Mundu um hvað jólin snúast! Það er auðvelt að heillast af piparkökufjalli með glassúr en það er hinsvegar ekki það sem færir þér eða fjölskyldunni varanlega hamingju. Reyndu að taka þér eins mikið frí og þú getur í þessum mánuði – þú átt það skilið.
Ást
Einhver ládeyða er yfir ástarmálunum þínum þessa vikuna. Kannski mætti skrifa það á gömlu góðu fullkomnunaráráttuna? Mundu að fólk er ekki fullkomið….ekki þú heldur! Ef þú heldur vel á spilunum og siglir ekki stjórnlaust í þunglyndisþanka má vera að eitthvað muni banka uppá hjá þér í næstu viku. Þolinmæði, þolinmæði.
Fjármál
Hugsanlega áttu afmæli síðar í mánuðinum eða byrjun þess næsta. Vil ég benda þér á að gæta hófs í eyðslunni því eins og við vitum ertu afskaplega skipulagður/skipulögð í fjármálunum. Þú átt eina góða vinkonu eða frænku….er ekki alveg viss hvort er – en allavega kvenpersónu sem þú ættir að taka þér til fyrirmyndar hvað stjórnun fjármála varðar. Þú nennir ekki timburmönnum.
Vatnsberi 20 jan-18 feb
Frami og velsæld
Ég veit þú hefur kviðið þessum tíma lengi. Desember. Kannski mætti skrifa það á skipulagsleysi….eða þú hefur gleymt þér á einhvern hátt undanfarna mánuði? Ekki örvænta samt, ég veit það er erfitt að heyra þetta. Um miðjan mánuðinn muntu fá góðar fréttir sem létta jólastressið töluvert. Fjúff! Mundu: Engar áhyggjur en vertu vakandi.
Ást
Æ, þú ert svo viðkvæmur og yndislegur, kæri vatnsberi. Það á eitthvert atvik eftir að henda þig þar sem kærleikur þinn og gleði verður misskilið sem daður. (óþolandi, ég veit!)
Þannig þú þarf pínulítið að vera meira blátt áfram – segja hvað þú virkilega hefur í hyggju eða kannski útskýra mál þitt sértu í sambandi eða hjónabandi. Alltaf best að segja hlutina eins og þeir eru.
Fjármál
Nú skaltu hugsa um hverjum þú ert að lána peninga eða hver er að lána þér peninga. Ekki alveg skýrt hérna, en eitthvað um óhugsuð peningaútlát er hérumbil það síðasta sem þú vilt þennan mánuðinn. Það eru jól, halló!
Fiskur 19 feb-20 mars
Frami og velsæld
Er ekki lífið dásamlegt? Jú, ég veit! Nú er allt á uppleið, krakkarnir og makinn glaður, nú eða kisinn, voffinn eða fjölskyldan. Fullt af tækifærum og móða undanfarinna mánaða er að hverfa. Njóttu þín!
Ást
Þú ert óvenju ástrík/ur þessa dagana. Þetta virðist hinsvegar vera algerlega þinn mánuður þannig ekki draga neitt úr ástinni – ekki berja þig niður fyrir að vera stórkostleg manneskja. Fyrir alla muni….láttu bara vaða!
Fjármál
Já, ég veit. Desember er erfiðasti mánuðurinn hvað fjármálin varðar. Hefurðu látið athuga hvort þú sért með talnablindu? Margir fiskar eru svo ofboðslega áttavilltir í fjármálum (kunna ekki að lesa á kort, kunna ekki að spara) en það er bara eitt einkenni sem mun ekki ganga frá þér. Þú ert svolítið „þetta reddast“ þennan mánuðinn. Allt í lagi – þetta er einn mánuður af tólf!
Hrútur 21 mars-19 apríl
Frami og velsæld
Hrúturinn er alltaf fullur af orku og fyrsta vika desember er engin undantekning. Hann verður þó að passa sig að missa sig ekki – fólk vill líka rólegheit og ekki má alveg tapa sér þó skemmtilegur tími fari í hönd.
Ást
Hættu nú að daðra við manneskjuna sem vill þig ekki. Þú átt til að vera svo óþolinmóð/ur að þú gætir fælt fólk í burtu. Betra væri að vera dálítið dularfull/ur og ekki gefa of mikið færi á sér. Það er miklu vænlegra til árangurs…
Fjármál
Þú þarft ekki að hafa miklar áhyggjur af fjármálunum þessa vikuna (sem betur fer!) Njóttu aðventunnar, farðu á kaffihús eða sötraðu jólaglögg í góðra vina hóp.
Naut 21 apríl -20 maí
Frami og velsæld
Jæja, nú er uppáhaldstími nautsins að renna upp. Þú hefur beðið allt árið eftir þessum tíma, lagt fyrir og unnið ötullega. Þú átt gott í vændum!
Ást
Afbrýðisemi á eftir að láta á sér kræla….annaðhvort hjá þér eða einhverjum nálægt þér. Ef um þig er að ræða, verðurðu að muna að þú átt enga manneskju – þú verður líka að hætta að taka gjörðum fólks persónulega. Aðeins þá muntu finna hamingjuna.
Fjármál
Nautið þarf engar áhyggjur að hafa af fjármálum þennan mánuðinn. Þú hefur verið það hagsýn/n að leggja fyrir að þetta mun ekki bara „reddast“ heldur haldir þú rétt á spilunum muntu jafnvel koma út í plús!
Tvíburi 22 maí-21 jún
Frami og velsæld
Oft hafa jólin verið kvíðvænleg hjá tvíburanum. Gæti það tengst æskunni eða óþægilegum minningum einshverskonar um hátíðina. Mundu bara að hið liðna er liðið og að horfa fram á veginn er best fyrir þig – og alla þína nánustu. Fortíðin getur ekki skaðað þig en best er að dvelja í núinu og stíga varlega til jarðar.
Ást
Lofaðir tvíburar verða að hafa tíma fyrir makann í huga því annars fer allt í vitleysu. Það er ekki hægt að keyra í fimmta gír inn í aðventuna og ætlast til að allir fylgi eftir. Ólofaðir tvíburar eiga bara að taka því rólega. Fæstir nenna að bæta ástarsambandi ofan á jólastress!
Fjármál
Ég veit þú ert að hugsa um þessa dýru, flottu gjöf sem þig langar til að gefa einhverjum nánum. Hamingjan er samt ekki mæld í peningum þó auðvitað sé gaman að gefa! Bíddu með að kaupa hana allavega í tvær vikur.
Krabbi 21 jún – 22 júl
Frami og velsæld
Þú ert afar meyr þessa fyrstu viku desember. Gæti það tengst annaðhvort börnunum þínum eða foreldrum? Leyfðu þér það bara – það er í eðli krabbans að reyna stöðugt að breyta líðan sinni. Þér MÁ líða svona!
Ást
Það eru hræringar í ástamálum krabbans þessa dagana. Ekki endilega slæmar þó. Stundum er gott að taka tíma út fyrir sig og mundu að stundum er autt rúm betra en illa skipað.
Fjármál
Þú hefur verið frekar annars hugar og allt í einu eru jólin handan við hornið. Þú þarft samt ekki að hugsa of mikið eða demba þér í streitufullar hugsanir. Taktu lífinu með ró (anda djúpt….út og inn….!)
Ljón 23 júl – 22 ág
Frami og velsæld
Ljónið er aðeins búið að fara fram úr sjálfu sér á þessum tíma ársins (ekkert nýtt svosem!) Þig langar svo mikið að gera öllum til geðs, hjarta þitt er svo örlátt en þú átt til að færast of mikið í fang.
Ást
Lofuð ljón: Hlustaðu á betri helminginn. Nei, bara HLUSTAÐU. Þú vilt oft tala og tala og gleymir að heyra það sem fólk er að segja. Bara að bakka – ljónið hefur gott af því þó því finnist það erfitt.
Ólofuð ljón: Mega alveg líta í kringum sig. Það er einhver að sverma fyrir þér en þú átt til að taka ekki eftir svoleiðis löguðu!
Fjármál
Fjármál eru í röð og reglu hjá ljóninu en það ætti að passa yfirdráttinn/vísareikninginn því það koma áramót eftir þessi jól…
Meyja 23 ág – 22 september
Frami og velsæld
Meyjan er róleg og sátt við frábært ár og siglir inn í desembermánuð með bros á vör. Enda áttu skilið að taka því rólega….þú hefur unnið ýmis þrekvirki á þessu ári og mátt vera þakklát/ur.
Ást
Það síðasta á lista meyjunnar fyrir jólin er að hugsa um ástarmálin….og það er bara fínt, ekki satt? Vertu bara ástfangin af sjálfri þér!
Fjármál
Meyjan á til að fyllast vonleysi að hugsa um fjármál í desember. Hún þyrfti að vera aðeins ákveðnari að hlusta á eigin innsæi þegar kemur að fjármálum, nú eða velja gjafir. Það er hugurinn sem skiptir máli, ekki tegundin á ilmvatninu eða hvort þú keyptir gjöfina í Hagkaup eða Epal. Og hananú!
Vog 23 sept – 22 okt
Frami og velsæld
Það er mikil ró yfir voginni þessa dagana. Ekki allir eru svo heppnir. Jólastress er ekki til í þér og þig langar mest að kúra þig uppí sófa með teppi, heitt kakó og góða bók. Gerðu öll blessuðu jólainnkaupin tímanlega og þú flýgur í gegnum mánuðinn.
Ást
Þú ert svo mikið í þinni eigin veröld að þú tekur illa eftir því sem er í gangi umhverfis þig. Lofaðar sem ólofaðar vogir ættu að opna augun gagnvart maka eða vinum sem eiga í vandræðum. Þú ert svo næmur og heilandi einstaklingur sem hefur svo mikið að gefa. Gefðu þá af þér! Eftir hverju ertu að bíða?
Fjármál
Þú gætir fengið tækifæri fyrstu eða aðra vikuna í desember. Eitthvað verkefni sem er í raun ekki vinna í eiginlegum skilningi fyrir þér, heldur í raun bara skemmtun. Taktu verkefninu því það er gott fyrir andlegu hliðina og budduna líka!
Sporðdreki 23 okt – 21 nóv
Frami og velsæld
Þú ert ekki alveg eins og þú átt að þér að vera þessa dagana. Farðu í reglubundið tékk hjá lækninum – já þetta sem þú ert búin/n að vera að fresta…þér líður svo miklu betur að vita að allt sé í lagi.
Ást
Eitthvað sé ég hjá sporðdrekanum varðandi vinnustaðinn hans. Eitthvað kemur upp, hvort sem það er hjá honum eða einhverjum nákomnum. Farðu varlega!
Fjármál
Óvænt útgjöld koma upp þannig best væri að fara varlega í eyðsluna svona fyrst um sinn. Allt mun enda vel að lokum og þú færð hjálp úr óvæntri átt.
Bogmaður 22 nóv – 21 des
Frami og velsæld
Einhver saknar bogmannsins síns mikið og hlakkar til að hitta hann. Veistu um hvað ég er að tala? Gott – sinntu því af öllu hjarta. Þú ert afskaplega góðu andlegu og líkamlegu formi og svo er svo gaman að tala við þig! Njóttu þín!
Ást
Sumir gætu mistúlkað bæði lofaða og ólofaða bogmenn þessa dagana. Þú átt til að treysta um of á aðra og ekki þitt eigið hyggjuvit. Hlustaðu á hjarta þitt!
Fjármál
Bogmaðurinn er búinn að vera skynsamur í fjármálum og uppsker nú árangur erfiðis síns. Mánuðurinn verður afar góður – til hamingju!
