Stórdularfullur og afar sjaldgæfur jarðsveppur getur þeytt grunlausum konum fyrirvaralaust í faðm ofsafenginnar fullnægingar án líkamlegrar ertingar, en sveppurinn sem fyrst kom fyrir sjónir vísindamanna árið 2001 sprettur upp af hraunbreiðum á Hawaii.

Sveppurinn er skærappelsínugulur að lit og virðist nálægðin við dularfullan gróðurinn geta slegið konur algerlega út af laginu með fyrrgreindum afleiðingum, en talið er að lyktin sem sveppurinn gefur frá sér valdi óhömdum lostanum sem leiðir til hámarks á örskotstundu ef ekki er varlega farið.

Hér er ekki um upplogna þvælu að ræða, þrátt fyrir að tilvist sveppsins virðist í fyrstu eins og klippt út úr lélegri vísindaskáldsögu. Þvert á móti hafa þeir John Halliday og Noah Soule, sem fyrstir rannsakenda greindu frá fyrirbærinu, fjallað ítarlega um málið og birtist rannsóknarritgerð þeirra þannig í International Journal of Meidicinal Mushrooms þar sem allur vafi er tekinn af; sveppurinn er raunverulegur og áhrifin eru sem fyrr segir.

Reyndar voru það svo sögusagnir eyjaskeggja sem náðu eyrum þeirra félaga og olli ferðalagi þeirra til Hawaii, að sjálfsögðu í nafni fróðleiksþorsta og í þágu vísinda. Sveppurinn vex villtur í hraunbeðu sem er u.þ.b. 600 til 1000 ára gömul á eldfjallaeyjunni en sveppurinn, sem ekkert nafn hefur fengið – er talinn gefa frá sér ilmefni sem líkjast ferómónum og hefur þannig einungis frygðaraukandi áhrif á konur.

Þá prófuðu þeir félagar kenninguna til þrautar og fengu þannig sjálfboðaliða af báðum kynjum til að þefa af jarðsveppnum, en ekki fór á milli mála að konurnar í hópnum sýndu augljós áhrif kynörvunar. Karlarnir hins vegar brugðust við með viðbjóði og þótta þegar þeir undirgengust sömu prófanir og hrökkluðust undan sveppastækjunni sem þeir flestir sögðu að ylli þeim flökurleika.

Engum sögum fer af því hvort rækta eigi sveppinn í þágu frygðarlyfja sem ætluð væru konum, en rannsakendur segja líklegast að sveppurinn innihaldi ferómón sem líkjast þeim taugaboðefnum sem kvikna til lífs við kynmök. Fari þó allt á besta veg, er augljóst að konur muni hagnast af og bíðum við á á ritstjórn því átekta í von um jákvæða framvindu. Í þágu vísinda, að sjálfsögðu.

IFLS greindi frá