Gullflúrað þrælabikiní Leu prinsessu úr Star Wars sem ófáa hefur dreymt um að eignast gegnum tíðina seldist á uppboði fyrir fáeinum dögum og var slegið hæstbjóðanda á litla 96.000 dollara – sem jafngildir u.þ.b. 12.300.000 íslenskum krónum.
Lea, sem klæddist bikiníinu nauðug undir járnhörðum einræðistilburðum Jabba the Hut, en prinsessan var einnig hlekkjuð meðan á múnderingunni stóð og hlaut kaupandinn keðjurnar sem héldu Leu fanginni í kaupbæti.
BBC greinir frá sölunni en þar segir einnig að hálsól Leu, hlekkirnir sjálfir og svo einnig staðfestingarnóta frá Richard Miller, sem var búningahönnuður myndarinnar hafi fylgt með í kaupunum. Fyrir þá sem ekki vita, var frumgerðin hönnuð úr mjúku og eftirgefanlegu, rauðu gúmmíi sem gyllt var sérstaklega í þeim tilgangi að gera bikiní ambáttarinnar því meira æsandi.
Engum gat órað fyrir vinsældum bikiníis Leu prinsessu meðan tökur stóðu enn yfir á því herrans ári 1983 og sagði Carrie Fisher þannig í kynningarviðtali við Rolling Stones um það leyti sem The Return of the Jedi kom út:
Hún [Lea Prinsessa] sýnir á sér kvenlegri hliðar; hún er meira styðjandi og hlýrri. En gleymum því aldrei að þessar kvikmyndir endurspegla í raun og veru hugaróra ungra drengja. Þess vegna var ein leiðin til að gera Leu kvenlegri sú, að láta hana einfaldlega fækka fötum.
Carrie fær enn þann dag í dag spurningar um bikiní ambáttarinnar en hér má sjá nýlegt viðtal við leikkonuna sem einmitt mun fara með hlutverk í nýjustu Star Wars myndinni sem brátt verður frumsýnd:
