Svartur depill í lófa niðurlútrar konu eða karlmanns, sem réttir fram hendina kann að vera merkingarlaus í augum margra. En svarti depillinn er þrunginn merkingu; þökk sé nýlegri samfélagsmiðlaherferð sem hefur farið stórum og hefur þegar bjargað mannslífum.

Svarti depillinn merkir nefnilega þögult óp á hjálp; merkið er neyðarkall þeirra sem búa við heimilisofbeldi en geta ekki greint frá stöðunni með berum orðum.

Frekari upplýsingar um samfélagsmiðlaherferðina er að finna á Facebook – en baráttuherferðin ber einfaldlega nafnið The Black Dot Campaign og er ætlað að styðja við fórnarlömb heimilisofbeldis, svo þau hin sömu geti óskað eftir aðstoð – svo fagfólk geti borið kennsl á merkið og brugðist við.

Á Facebook síðu hópsins segir ennfremur:

„Þessi baráttuherferð er gerð svo fórnarlambið geti merkt lófann með svörtum depli, svo ástvinir, stuðningshópar og fagfólk geti borið kennsl á þögult neyðarópið og boðið fram þá aðstoð sem er nauðsynleg svo hann eða hún geti fengið stuðning til að komast burt úr skaðlegum aðstæðum. Það sem meira er; eftirlifendur heimilisofbeldis hafa margir hverjir deilt ljósmyndum af sjálfum sér með depil í lófanum til að sýna stuðning og hvatningu – en einnig til að sýna að það er hægt að losna úr skaðlegum aðstæðum.“

Herferðinni var hrundið af stað fyrr í september og telur nú Facebook síðan ein yfir 26.000 stuðningsmeðlimi. Einhverjir hafa gagnrýnt framtakið og sagt að ekki sé hægt að hrinda slíku framtaki af stað án þess að nefna til stuðningshópa um leið; að fræða þurfi hjálparsamtök sem styðja við þolendur heimilisofbeldis. Einnig hafa aðrir sagt að svarti depillinn sé hættulegur leikur og geti ögrað ofbeldismennum til illra verka, að fórnarlömbin sjálf geti jafnvel verið í meiri hættu en áður.

Þessu hafa stofnendur vísað á bug og segja að fórnarlömbin sjálf viti oft hvað þarf til að ögra og hvetja til ofbeldis og að hver og einn verði að meta í sínu eigin tilfelli hvort hættulegt sé að merkja lófann með svörtum depli.

Í viðtali við Huffington Post sagði talsmaður Black Dot þannig að oft gæti verið hættulegt og erfitt fyrir fórnarlömb ofbeldis að ræða beint út um stöðuna, af ótta við viðbrögð ofbeldismannsins og einnig af ótta við að enginn trúi þeim.

„Svarti punkturinn gæti hjálpað þolendum heimilisofbeldis að ræða út um viðbjóðinn og það getur hjálpað að hafa um nokkra ólíka möguleika að ræða þegar frásögn er annars vegar, því aðstæður þeirra sem búa við heimilisofbeldi geta verið æði misjafnar.“